Samfélagslegur kostnaður, skiptir hann máli?

(Grein í Morgunblaðinu 11. nóvember 2011)

Í Morgunblaðinu í fyrradag var frétt þar sem greint var frá því að forstjóri Landsnets kom á fund atvinnuveganefndar Alþingis til að ræða kostnað við dreifikerfi raforku á Reykjanesi. Mig undrar að málið sé ekki frekar á borði umhverfisnefndar þingsins en vona að málið verði fljótlega á fundi þeirrar nefndar.Eftir fréttinni að dæma hefur formaður nefndarinnar, Kristján Möller, nú þegar mótað sér skoðun á því að of dýrt sé að leggja rafmagnslínur um land Sveitarfélagsins Voga í jörð. Í ljósi þessara orða er forvitnilegtað vita hvort formaðurinn hafi mótað sér skoðun aðeins út frá samræðum við forstjórann.

Það má vel vera að útreikningar Landsnets séu þeir einu réttu í málinu, þrátt fyrir að hægt sé að rökstyðja annað. Við sem höfum átt í viðræðum við Landsnet höfum ítrekað bent á ýmis álitamál og t.d. má benda á að Landsnet metur ekki samfélagslegan kostnað af lagningu loftlína. Það er þó ekki svo að Landsnet hafi aldrei heyrt um mat á slíkum kostnaði. Að frumkvæði Landsnets vann stofnun Sæmundar fróða rannsókn sem miðaði að því að meta jaðarkostnað samfélagsins vegna sjónrænna áhrifa háspennulína og mastra. Rannsóknin var unnin af Önnu Sigurveigu Ragnarsdóttur meistaranema í umhverfis- og auðlindafræði og kom út 2010.

Mig langar að vita hvort Landsnet hafi gert grein fyrir þessari skýrslu í kostnaðarmati sínu og hvort þingmenn atvinnuveganefndar Alþingis hafi kynnt sér skýrsluna. Eða getur verið að innihald hennar hafi ekki hentað markmiði fundarins? Spyr sá sem ekki veit.