1.Vilt þú að álver rísi í Helguvík?, hvað telur þú að þú getir best gert til að það verði – skýr dæmi um hvað þú getur gert!
Ef álver í Helguvík þýðir brunaútsala á orku, undanþágur varðandi brennisteinsmengun, tvöfalda röð af 30 m háum stálmöstrum og virkjanir í Eldvörpum og Krísuvík - þá segi ég nei.
2.Vilt þú að raflínur verði lagðar í lofti til Suðurnesja? Hvað telur þú að þú getir best gert til að það verði – skýr dæmi um hvað þú getur gert!
Ég bind vonir við að hópur sem Alþingi skipaði á sínum tíma skili hugmyndum um stefnu í raforkuflutningsmálum sem víðtæk sátt gæti náðst um. Við slíka sátt mun ég una.
3.Vilt þú að Kísilver rísi í Helguvík? Hvað telur þú að þú getir best gert til að það verði – skýr dæmi um hvað þú getur gert!
Ég vil Kísilver í Helguvík - en ég get ekki stutt kröfur bandarískra fjárfesta um frekari afslátt frá orkuverði. Ég bind miklar vonir við sameiginlega markaðssetningu Suðurnesjanna í gegnum atvinnuþróunarfélagið Hekluna og vonandi opnar það leið fyrir fjárfesta sem ekki eru eingöngu að koma til landsins til að fá ódýra orku og ódýrt vinnuafl.
4.Vilt þú að samkeppnisumhverfi gagnavera verði styrkt hér á landi? Hvað telur þú að þú getir best gert til að þín skoðun verði ofan á – skýr dæmi um hvað þú getur gert!
Samkeppnisumhverfi gagnavera er fyllilega sambærilegt við það sem best gerist í Evrópu nú þegar og það getur verið ágætur kostur að gagnaveraiðnaður þróist hér í bland við önnur lítil og meðalstór iðnfyrirtæki sem greiða sanngjarnt verð fyrir orkuna, eru arðbær og skapa störf. En sérstaklega vil ég styrkja samkeppnisumhverfi matvælaframleiðenda.Ég vil að á Suðurnesjum byggist upp matvælastóriðja og við verðum þekkt um allan heim fyrir mikið úrval af fjölbreyttum fullunnum matvælum.
5.Vilt þú að niðurstöður matshóps um virkjanakosti verði samþykktar? Hvað telur þú að þú getir best gert til að þín skoðun verði ofan á – skýr dæmi um hvað þú getur gert!
Nei ég hef talað fyrir því að fleiri staðir á Reykjanesi verði settir í verndarflokk - eða allavega biðflokk á meðan frekari rannsóknagagna er aflað. Ég vil flýta grunnrannsóknum á svæðinu - við verðum að fá að vita meira, getum ekki tekið þá áhættu að orkan á svæðinu klárist innan nokkurra áratuga.
6.Vilt þú að næsta ár verði tekjuskattsfrítt ár fyrir almenning svo menn geti greitt af húsnæðislánum? Hvað telur þú að þú getir best gert til að þín skoðun verði ofan á – skýr dæmi um hvað þú getur gert!
Nei – Ríkið hefur ekki efni á því að afsala sér einum stærsta tekjustofni sínum í heilt ár. Slíkt tal er óábyrgt og ekkert nema ávísun á hallarekstur eða meiri niðurskurð. Ég vil samtal við almenning sem leiðir til víðtækrar sáttar um hærri laun og raunverulega betri kjör.
7.Hvernig vilt þú koma til móts við erfiða stöðu heimila í kjölfar bankahrunsins?
Ég styð ekki flata niðurfellingu skulda. Ég vil vinna að nýjum samfélagssáttmála með aðkomu ríki og sveitarfélaga, verkalýðsfélaga, lífeyrissjóða og samtaka atvinnulífsins.
Ég vil að inntak sáttmálans verði:
1. Laun verða hækkuð, vinnuvikan stytt og framleiðni á vinnustund verði aukin (framleiðni á vinnustund á Íslandi er nú mun lægri en í nágrannalöndum). Forgangsverkefni er að 40 stunda vinnuvika dugi til eðlilegrar framfærslu
2. Peningamarkaður. Okurlán til almennings afnumin og vísitala lána verði tengd launaþróun. Finna þarf leiðir til þess að háir vextir þyngi ekki um of fyrstu greiðslur af lánum.
3. Endurskoða bótakerfið, auka virkni bótaþega og tengja greiðslur almannatrygginga við eðlilega framfærslu. Styðja sérstaklega við barnafjölskyldur með hækkuðum barnabótum og gjaldfrjálsum leikskóla. Tryggja skilvirka lágmarks heilsugæslu um allt land, afnema komugjöld á heilsugæsluna og skilgreina almennar tannviðgerðir aldraðra, öryrkja, barna og unglinga sem hluta gjaldfrjálsrar lámarks heilsugæslu.
4. Húsnæðismál. Sameiginlegt átak í húsnæðismálum (ríki, sveitarfélög, lífeyrissjóði og verkalýðsfélög) þar sem markmiðið er að stytta byggingartíma og lækka byggingarkostnað þannig að almennt launafólk geti fengið þak yfir höfuðið án þess að þurfa að fórn bæði heilsu og afkomumöguleikum til langs tíma. Vaxtabætur og húsaleigubætur verði endurskoðaðar þannig að húsnæðiskostnaður verði svipað hlutfall ráðstöfunartekna og í nágrannalöndum.
8.Vilt þú að Kvótafrumvarp ríkisstjórnarinnar verði samþykkt? Hvað telur þú að þú getir best gert til að þín skoðun verði ofan á – skýr dæmi um hvað þú getur gert!
Ég hefði viljað sjá fastar tekið á framsali veiðiheimilda í frumvarpinu sem kom fram sl. vetur. Það þarf að ná sátt um þessi mál á þeim grunni að sjávarauðlindin er sameign þjóðarinnar og enginn afsláttur veittur af því. Þá er líka eðlilegt að þjóðin fái eðlilegt og sanngjarnt afgjald eins og búið er að lögfesta með sérstaka veiðigjaldinu.
No comments:
Post a Comment