Almannahagsmunir í stað einkahagsmuna

Á síðustu árum hafa kapítalísk viðhorf einkennd íslensk stjórnmál. Flestir íslenskir stjórnmálaflokkar vilja byggja upp samfélag á Íslandi eftir forskrift kapítalismans. Flóra íslenskra stjórnmála einkennist af því hve sterkt velferðakerfi flokkarnir vilja til að vega upp á móti göllum þess að markaðurinn setji leikreglur í samfélaginu. Lengst ganga liðsmenn frjálshyggjunnar sem berjast fyrir frelsi peninganna en frelsi almennings mætir afgangi.

Vinstri Hreyfingin grænt framboð stendur gegn kapítalískri hugmyndafræði og vill byggja samfélagið upp með áherslu á félagslegt réttlæti og sjálfbæra þróun. Það þýðir að ákvarðanir eru teknar út frá félagslegum sjónarmiðum og spurt um afleiðingar á heilbrigði og samfélag áður en spurt er um hagnað og gróða.

Í íslensku samfélagi hefur ofuráhersla verið lögð á sjónarhorn peninganna og þannig hafa efahagsmál tekið yfir umræðuna. Við erum þjálfuð í að hugsa alltaf fyrst og fremst um kostnað og framtíðarmöguleika á hagnaði og sú niðurstaða látin ráða stefnunni.  Norræna velferðastjórnin hefur gert margt gott en því miður hefur hún ekki náð að brjótast út úr þeim ramma sem hugmyndir kapítalismans hafa sett þjóðfélaginu. Aðgerðir til hjálpar heimilum hafa verið á forsendum fjármálafyrirtækja og  endurreisnin hefur verið á forsendum þeirra hugmyndafræði  sem ríkti fyrir hrun. Þannig hefur Vinstri Hreyfingin grænt framboð ekki náð að breyta grunnhugsun í íslenskum stjórnmálum.

Næsta kjörtímabil skiptir miklu máli fyrir framtíðina. Það er grundvallaratriði að róttæk félagshyggja nái tökum á hugum þeirra sem taka við uppbyggingu samfélagsins. Til þess þarf nýjar grundvallaráherslur og nýja grunnhugsun. Kapítalísk hugmyndafræði er fullstrokkuð, hún var aldrei það uppbyggingarafl sem margir töldu hana vera. Það er kominn tími til að skýra stefnuna og taka einbeitt stím á uppbyggingu samfélags sem tekur hagsmuni almennings framyfir hagsmuni fyrirtækja og fjármagnseigenda.